Fjord Invest investerer i Yast AS gjennom fonda Fjord Invest SørVest AS og Fjord Invest Såkorn AS, skriv selskapet i ei pressemelding.

Yast AS er eit programvareselskap med hovudkontor i Sogndal. Selskapet har utvikla eit enkelt system for timelisteføring, som i dag har 6000 brukarar spreidd over heile verda. Løysinga er både web- og mobilbasert, og no står global lansering for døra.

- Godt utgangspunkt for å lukkast

– Yast har eit unikt nisjeprodukt som raskt og enkelt let seg distribuere til ein global marknadsplass, kombinert med eit sterkt og engasjert team. Det er eit godt utgangspunkt for å lukkast, og vi har difor valt å satse på denne bedrifta, seier Roger Flølo, partnar i Fjord Invest Management i pressemeldinga.

Breitt engasjement

– For gründerbedrifter som Yast er det særs viktig med tilgang på risikokapital, og vi er både stolte og glade for å få Fjord Invest med oss på eigarsida. I tillegg til vekstkapital, tilfører Fjord Invest oss forretningskompetanse og nettverk som er viktig for å nå dei måla vi har sett oss, seier Halvor Gregusson i Yast. Følg Yast-bloggen.

Han er også nøgd med at ei gruppe lokale investorar deltek i kapitalutvidinga, noko som er med på å skape eit breitt lokalt engasjement om verksemda.
Investeringa i Yast skjer i form av retta emisjonar mot Fjord Invest og andre private investorar. Fjord Invest vil etter emisjonen eige 18 prosent av Yast AS.