Ei undersøking frå Heidrick & Struggles syner at norske styre er dei styra som har flest styremøte i Europa. Norske styremedlemar får minst betalt, sit kortast tid og er skeptiske til å sleppe utlendingar inn i styra, skriv Ukeavisen Ledelse som siterer ein artikkel i Dagens Næringsliv.

I gjennomsnitt får norske styreleiarar og styremedlemar 288.000 kroner vervet, mot eit europeisk gjennomsnitt på 600.000 kroner. Undersøkinga er gjort blant 400 store europeiske børsnoterte selskap.

Dårleg med evaluering

Andre funn i den ferske undersøkinga, er at norske styre manglar breiddekompetanse samanlikna med europeiske styre. Styremedlemane sit i få styre, dugleiken til styra blir i liten grad evaluert og styra føretrekk å ta avgjersle i plenum framfor gjennom fagkomitear.

Skal utvikle og utfordre

Dei norske styra har i gjennomsnitt 14,2 styremøte årleg, mot 9,4 i resten av Europa. Styrenestor Inge K. Hansen er skeptisk at norske styre har flest møte i Europa.

Han seier til Dagens Næringsliv at faren med for mange styremøte er at det blir for mye fokus på kontrollaspektet. Oppgåva til styret er å kontrollere, men det skal også utvikle og utfordre administrasjonen.

- For mange styremøte kan også føre til ei rolleblanding mellom administrasjon og styre, meiner Hansen.