Teina held til i jordbruksbygda Breim i Gloppen og ville jobbe med dyr. Det vart høner.

I Hønseriet er det ungane sjølve som fôrar, steller, plukkar egg, vaskar og tørkar dei, pakkar og sel.

Sjå innslag om Hønseriet i Teina barnehage laga av NRK Sogn og Fjordane og vist på Norge Rundt.

Unge forskarar

Dei forskar også på korleis egga ser ut. Kva mønster er det i dei? Korleis smakar egga? Alt som ein del av innhaldet i barnehagen.

Arbeidet er for barna ein del av leiken og gjennom det lærer dei om ansvar og omsorg for dyr. 

Real
Teina barnehage brukar REAL som verktøy og utviklar stadig nytt opplæringsmateriell til bruk i andre barnehagar.

Har du lyst å delta, kan du ta kontakt med Høgskulen i Sogn og Fjordane ved Ivar Offerdahl. www.hisf.no  .

 Les meir om Teina Barnehageog om Real-metodikken

GULLKORN FRÅ BARNEMUNN I TEINA BARNEHAGE

God salsskikk
Det er salsdag og små og vaksne går igjennom "rutinane" for god salskikk!
I dag er det tre gutar som får ansvaret.
Britt: "Kva skal de seie når de leverer egg til dei som skal kjøpe?"
Gutane er litt usikre...
Britt: "Vææær.."
Bjørn-Inge strålar opp: "Vær hilset !"

Om slakting
Hønene vert sendt til "slakteriet" når dei er begynt å bli gamle, sånn ca. 1-1 1/2 år. Dei er i hønseriet og gjer reint etter at hønene er vekk.
Oda. "Ho besta kan ikkje ete meir is."
Annlaug: "Åh ? Kvifor ikkje det?"
Oda: "Nei ho vil ikkje ha så tjukk mage... Ho vil slakte seg litt."

Høna eller egget ?
Teina har besøk frå Høgskulen i Sogn og Fjordane. To karar er i hønsehuset ilag med tre barn. Den eine kjem i prat med Oda.
Dag: "Du kan vel mykje om egg du?"
Oda nikkar og fortel at egga er runde og spissen på egga må vende ned når dei skal pakkast i kartongar.
Dag: "Men du, kven var det som kom først, høna eller egget?"
Oda ser på han og sukkar: "Veit du ikkje det då? Det var høna!! Ho kom i lastebil"