Bedriftsundersøkinga som Næringsbarometeret gjennomførte i april, viste at 40 prosent av bedriftene nytta finanskrisa til å auke kompetansen og å orientere seg mot nye marknadar.

Dette kom fram i Næringsbarometeret for Hordaland og Sogn og Fjordane, som vart lagt fram 26. mai 2009.

Produktutvikling og FOU

Nesten kvar tredje bedrift hadde auka fokuset på produktutvikling og FOU (forsking og utdanning). Fleire studiar viser at dei bedriftene som brukar nedgangstider til å skaffe seg eit forsprang teknologisk og kompetansemessig, ofte oppnår stor suksess når marknaden snur. Det er derfor trygt å få dokumentert at næringslivet på Vestlandet satsar langsiktig, står det i pressemeldinga frå aktørane bak Næringsbarometeret. Sjå Vestlandsrevyen..

Situasjonen kraftig endra

I løpet av 2009 endra situasjonen for store delar av næringslivet på Vestlandet seg kraftig. I oktober i fjor var hovudbiletet som næringslivet teikna i stor grad positivt, og dei fleste såg for seg at veksten skulle halde fram i 2009, om enn med noko lågare styrke.

Det biletet som næringslivet no teikna, var mindre optimistisk. Med unntak av tenesteyting, vart det venta nedgang innan alle næringane. Konkurransen hardnar til og salsprisane vart stadig meir pressa. Hardast råka var bygg og anlegg og industrien.

Næringslivet i Sogn og Fjordane var i fjor meir optimistiske enn i Hordaland når det gjalt utviklinga i sysselsetjinga. Ein fjerdedel av verksemdene ville auke talet på tilsette, mens to av tre bedrifter venta stabil sysselsetjing. 

Færre mangla arbeidskraft

Sjølv om rekrutteringsproblema var kraftig redusert sidan våren 2008, var det framleis delar av næringslivet som sleit med å skaffe kompetent arbeidskraft. Kvar tredje bedrift innan verkstadindustri og bygg og anlegg meldte om at dei har ubesette stillingar som følgje av mangel på arbeidskraft.

Kraftig nedgang i investeringane

Utsiktar til lågare etterspurnad og svekka lønsemd, kombinert med vanskeleg tilgang på kapital, fører til lågare investeringar. Over 30 prosent av bedriftene svarte at dei har utsett planlagde investeringar som følgje av finanskrisa. Prosentdelen var særleg høg i oppdrettsnæringa og innan mekanisk industri.  

Kontaktpersonar:

• Tore Thorsnes, direktør NAV Sogn og Fjordane, tlf. 950 82 733
• Halvor Flatland, direktør Innovasjon Norge, tlf. 957 81 493
• Endre Høgalmen, assisterande fylkesdirektør for regional utvikling Sogn og Fjordane Fylkeskommune, tlf. 952 07 789
• Karin Halle, regiondirektør NHO Sogn og Fjordane, tlf. 416 19 200
• Olav Hjelle, regionbanksjef bedriftsmarknad Sparebanken Vest , tlf. 917 15 561