Naustdal barne- og ungdomsskule er modellskule for entreprenørskap i 1-4 klasse. Her lærer unge naustedøler entreprenørskap og nyskaping gjennom prosjekt som Kardemommebygd og Parkens By.

Barn skapar eigne arbeidsplassar

Primus Motor er lærar Jørn Helgheim, som også er prosjektleiar for Ungt entreprenørskap. Han ser det som viktig at elevane får kunnskap om korleis lokalsamfunnet fungerer og korleis ein kan skape sin eigen arbeidsplass.

Hjelper andre

Helgheim stiller gjerne opp og hjelper andre skular i gang med tilsvarande prosjekt.
- Så langt har vi etablert kontakt med skular i Florø og Førde, men vi ser gjerne at fleire hiver seg frampå. Dette er gøy og lærerikt for alle partar, seier Helgheim, som har jobba tett med Eivind Rogne og Ivar Offerdal ved Høgskulen i Sogn og Fjordane.

Verktøyet dei brukar er REAL, som Offerdal henta frå sørstatane i USA i 2003. Les om REAL.

Parkens By

Med 30 "naustdalar" i handa kunne dei yngste elevane ved skulen handle på marknaden i Parkens By. Elevane hadde på førehand konkurrert om å lage den beste byen.

Deretter samla dei seg om å bygge opp og utvikle bedriftene i byen. Der var alt frå såperi, kafe, smykkeverkstad, neglesalong og tinnverkstad. Pengane (naustdalarane) lånte dei i banken av ein svært så myndig banksjef. - Veldig travelt det her, sa Andreas Apelseth i det han delte ut pengar og noterte i boka.

Ved sidan av sat to elevar som fungerte som kommuneadministrasjon. Dei godkjende og delte ut driftsløyve. Ei av bedriftene hadde fått bot for å rope til kundane. Slikt går ikkje dersom ein skal drive skikkeleg!