- Å vere gründer i Sogn og Fjordane er heilt fantastisk. Ein får ikkje berre vere gründer første året, men kvar dag og heile tida, sa Sindre Kvalheim frå Local Host AS i talen etter at han fekk gründerprisen for ungdom i 2010.

Kjenner du ein gründer mellom 18 og 35 år med eiga verksemd, eller er du ein gründer sjølv?

Pengar & heider

Gründerprisen for ungdom er på 30.000 kroner, og har blitt delt ut årleg sidan 2006. Han skal stimulere til nyetableringar hjå ungdom i Sogn og Fjordane. Samstundes er prisen ei ekstra oppmuntring til unge og driftige gründerar.

Tidlegare vinnarar

Tidlegare vinnarar er Kvalheim, Njål og Linn Wilberg som har etablert AskAdam AS, Jarand Fretheim bak Stadt Surfcamp og gründerane bak Moods of Norway.

Må vere etablert i Sogn og Fjordane

Prisen blir delt ut på fylkestinget i desember. Prisvinnaren skal vere busett og verksemda lokalisert i Sogn og Fjordane, og etableringa må ha skjedd i løpet av dei fem siste åra. Juryen er sett saman av representantar frå Fylkeskommunen, NHO, Fylkesmannen, Innovasjon Norge, samt ein tidlegare vinnar av Gründerprisen.

Les meir på nettsidene til Sogn og Fjordane fylkeskommune.