Fjord-O startar i Sogn

Orienteringsgruppa i Sogndal IL  står klar for ei stor utfordring fire dagar i juli. Rundt tusen løparar kjem til Fjord-O Nordvestgaloppen. Når familie og hjelparar kjem i tillegg, ventar arrangørane at rundt 1.500 personar vil vitja Sogndal medan konkurransane går føre seg frå 14. til 18. juli.

– No gler me oss masse til å koma i gang, og eg er glad for at me er blitt så godt mottekne i orienteringsmiljøet, både i Noreg og internasjonalt. Det er ikkje tvil om at o-løping i fantastisk fjordnatur trekkjer folk, og spesielt dei to løpa på Haukåsen har vore ettertrakta, seier Karl Helge Albretsen i arrangørkomiteen til Sogn Avis.

Oppkøyring til VM i Trondheim

Arrangørtrioen, Christian Frøyd, Jøril Hovland og Karl Helge Albretsen (Foto: Ole Kristian Åset) peiker på at konkurransane i Sogn går føre seg berre tre veker før VM i orientering startar i Trondheim. Difor vil mange av toppløparane ta konkurransane i Sogn som ein viktig oppkøyring før VM.