ENOVA gründercamp vart arrangert i Førde 22.oktober. Deltakarane på gründercampen kom frå tre ulike skular i fylket; Hafstad og Flora (studiespesialiserande med vekt på naturfag), Øyrane (elektrofag) og Flora (klima og energi). Både Sunnfjord Energi (SFE) og studentbedrifta Sunnfjord Automasjon SB stilte med fire mentorar heile dagen.

Utfordringa
Målet med arrangementet var å skape energieffektive løysingar for anten hus, lading av elektronisk utstyr eller i på andre område i kvardagen. Deltakarane kom opp med idear som alt frå turladar montert i kneleddet for å utnytte energien i rørslene til ”Plusshuset” plassert på ei øy der du kan hente energi frå både sol, luft og vatn.

Vinnarane
Vinnarane vart Kine Berg Ålhus (Øyrane vgs), Håkon Aleksander Hartved Olsen og Kristina Erikstad Sæterdal (begge frå Hafstad vgs), Ole Jakob Lid og Daniel Brandesæter Trettevik (begge frå Flora vgs).

Vinnarproduktet
Dei gikk til topps med ein smart ide som kan realiserast; ei belastningsfjør som genererer energi til bruk for ulike duppedingsar. Vinnarlaget har elevar frå alle dei tre deltakande skulane. Dermed blir dei alle representerte på den nasjonale gründercampen i Trondheim i januar.

Konklusjonen
- Det var genialt å kombinere ulike fagmiljø og involvere ingeniørar og ingeniørstudentar som mentorar. Det ga arrangementet eit ekstra løft, og gjer at vi kan konkludere med ord som suksess, seier rådgjevar i UE, Eivind Husabø.