Over tusen elevar frå 8. klassen og oppover, 50 lærarar og 120 utstillarar fylte Florø idrettssenter, på karrieremessa ein fredag i mai. Øvst på agendaen denne dagen var rekruttering av ungdom til framtidige jobbar i det lokale næringslivet. Naturleg nok var dagleg leiar i Framtidsfylket, Anne van Oorschot, på plass med stand.

Største i landet?

- Dette er den største karrieremessa i Sogn og Fjordane nokon sinne, og truleg også den største på landsbasis. Her er ein fantastisk breidde i bedrifter og stands, mange har gjort seg stor flid med utstillingane, seier Holger Aasen, seniorrådgjevar i NHO og dagleg leiar i Ungt Entreprenørskap. Fylkesmessa nådde fram til folk i fylket både gjennom Sogn Avis og Firda.

Lokale heltar underheldt

Laurdag og søndag var det mange som stakk innom for å sjå utstillingane, kokkekampen mellom Stian Grimseth og Avinor-sjef Siv Merete Stadheim. Dei yngste tykte det var stas med Florø-jenta Solveig Hareide, som har gjort ein karriere innafor NRK. Ho er dyktig og ein god rollemodell for ungdom i fylket.
 

Tid for evaluering

-Det er første gongen vi arrangerer denne typen messe. Alt tyder på at det er berre finjusteringar som skal til for å gjere det endå betre, men konsertdelen kan vi trygt seie vi overlet til dei som kan det, seier ein sliten, men svært nøgd arrangør. Etter å ha jobba saman med Roy Austbø sidan november for å få alt på plass til messehelga denne flotte maihelga, er han heilt utlada. – Immunforsvaret er heilt på felgen, og forkjølinga har sett seg skikkeleg, men gi meg nokre dagar og eg er i gang att, seier Per Øyvind Helle, mannen med evne til å skape aktivitet.

Sogn og Fjordane fylkeskommune, Ungt Entreprenørskap/NHO, Sunnfjord 2020, Flora Industri- og Næringsforening, Jubileumskomitèen Flora kommune og Framtidsfylket AS står bak storsatsinga.