- Vi har fått lov til å få namnet "Barn i fokus" og vidareføre arbeidet med å hjelpe barna ved barneheimen sør i Latvia, fortel Ulrikke Thomsen (19) frå Måløy. Saman med Marie Rivedal (19) frå Førde har dei nettopp registrert stiftinga som skal drive støttearbeid direkte inn mot dagheimar, barneheimar og barn i private heimar. 

Vil bli store

- Ideen er å engasjere folk som kan støtte oss og få organisasjonen til å bli stor - veldig stor! seier Ulrikke. Ho og Maria var i Latvia saman med dei andre i ungdomsbedrifta frå Øyrane vidaregåande skule i fjor haust. Då reiste dei med 900 kasser kle, sko, leikar, tepper og innsamla pengar til å ta med barna på tur. No vil dei to satse vidare.

Sjå "film" frå då Barn i Fokus UB tok turen til barneheimen og dagsenteret i Latvia

- Vi kjem til å dedikere mykje tid, men førebels på fritida. Det blir ubetalt og kjem i tillegg til studier og jobb, førebels med base i Bergen.

Harde kår i Latvia

- Det er så mange barn i Latvia som vi er blitt glade i og som fortener det beste. Dei lever under veldig harde kår! seier Ulrikke.

Ho innrømmer glatt at dei ikkje hadde klart dette utan kunnskapen og erfaringane frå arbeidet i Ungt Entreprenørskap.

- Vi har fått veldig god hjelp, m.a. frå Eivind Husabø, avsluttar ho.