"Førdefestivalen er den største internasjonale folkemusikkfestivalen i Skandinavia og ein av knutepunkt-festivalane i Norge. Festivalen har kjempa seg gjennom medgang og motgang, barne-sjukdommar og skot for baugen til den no står fram som ein godt moden 20-åring. No får denne fargeklatten av ein festival si eiga bok, skriv Skald forlag i ei pressemelding.

Møt masaiar i Førde

"Du treng ikkje å reise til masaiane i Afrika for å oppleve ei natt du aldri vil gløyme. Du kan reise til Førde. Festivalen føregår ikkje berre i mørke konsertsalar med semiformell kleskodeks og stive likjefingrar; den skjer i gamle sperrestover og midt i rabarbraskogen til Nikolai Astrup. Den skjer i og rundt gatene.

Forfattarane har også reist motsett veg, og besøkt nokre av artistane i heimlanda deira, i Afrika og Sibir. Desse og mange andre forteljingar kan du lese i boka om Førdefestivalen. Fleire forfattarar og fotografar har bidrege: Olaug Nilssen, Katrine Sele, Thomas Espedal, Oddleiv Apneseth og Knut Utler.