- Værlandet har mange naturkvalitetar, og det vil vi få endå meir fokus på, seier Gry Leite, dagleg leiar i Værlandet Båt. Med betre serveringstilbod og fleire aktivitetstilbod trur at ho mange fleire vil ta turen til øyriket.

Direktesending frå havørnreir

Lokale drivkrefter har jobba for å få etablert eit informasjonssenter for sjøfuglvern på Værlandet sidan 2002. I 2008/2009 vart senteret fullfinansiert med 6 millionar kroner frå Miljøverndepartementet og 1,7 millionar kroner frå Sogn og Fjordane Fylkeskommune. Askvoll kommune har i samarbeid med fylkeskommunen finansiert kaianlegget med 1,2 millionar kroner. Ein liten del av utstillinga er alt kommen på plass: På kroa kan ein sjå direktesending frå eit havørnreir.

Freding – frå hemsko til ressurs

- Ein tredel del av øya vår er freda. Dette såg vi tidlegare på som ein hemsko for utvikling. Etter at vi hadde gjennomført Naturbruksprosjektet, i regi av Fylkesmannen, vart vi klar over at verna område kan bety ein ressurs for oss. Snøballen byrja å rulle. Etter kvart fekk vi finansieringa på plass og snart kan vi ønskje velkomen til sjøfuglsenteret, seier Gry Leite.

Turistane har oppdaga Værlandet

Værlandet Båt har saman med fleire lokale aktørar vore ei drivkraft i denne utviklinga. Dei ønskjer å utvikle eit heilskapleg reiselivstilbod i tilknytning til senteret. Selskapet investerer no 4,8 millionar kroner i nytt servicebygg og ny kro, i tillegg til ny profil for verksemda. Værlandet Båt vart etablert i 1979 og har gradvis sidan 2005 gått frå å vere berre båtverkstad til marina, kro og reiselivsverksemd, med overnatting og servering. Eigarselskapet Verkstaden tilbyr reparasjonar av båtar.

Samlingsplass for lokale og turistar

Ideen er å skape ein samlingsplass for både lokale folk og tilreisande, med matservering og ulike aktivitetstilbod. Infosenteret skal vere spennande og informativt, med dei verna områda langs kysten som tema. Plassen vil vere eit knutepunkt der ein får samla informasjon om øyene, kva ein kan sjå og vere med på

- Vi opplever ei veldig oppblomstring på Værlandet. Turistane har verkeleg oppdaga oss. Båtfolket frå Florø i nord til Bergen i sør kjem stadig oftare innom øyriket vårt. Med betre tilrettelegging for turistane trur vi endå fleire vil besøke oss, seier til slutt Gry Leite.