- Svara syner at dei viktigaste kriteria for å få folk til å flytte til Sogn og Fjordane, er høvet til å få seg relevant jobb og at fylket byr på gode oppvekst-vilkår for born, seier Anne van Oorschot. Ho er dagleg leiar i Framtidsfylket AS.

 Flott natur – det største plusset

 - Undersøkinga viser også at den flotte naturen er viktig for dei som trivst her, og for dei som ønskjer å flytte hit. Begge gruppene svarar at dette er den største styrken fylket har for å tiltrekkje seg tilflyttarar.

Kommunikasjonsbyrået Burson&Marsteller utførte omdømmeundersøkinga for Framtidsfylket AS.

217 personar busett i fylket og 376 utanfor fylket har svara på undersøkinga som vart sendt ut gjennom epost og sosiale medier.

Målet var å kartleggje desse viktige målgruppene, og å få innsikt i flyttevanane og avgjerande faktorar knytt til desse. Av dei som bur i Sogn og Fjordane er det heile 70,2 % som ikkje har flytteplanar, og blant dei som bur utanfor fylket er det heile 80 % som kunne tenkje seg å flytte til Sogn og Fjordane. Begge grupper trekkjer fram naturen som det største plusset. 

Drøymer om livet på landet

 - Dette stemmer også godt med ei undersøking Respons gjorde for Aftenposten nyleg. Der var konklusjonen at kvar tredje innbyggjar i Oslo drøymer om å flytte ut av hovudstaden og busetje seg på landsbygda, seier van Oorschot. - Vi kan tilby alt dette i Sogn og Fjordane, og tek med glede i mot dei som vil flytte hit.

Dei som ikkje bur i fylket er spurt om dei viktigaste karrieremessige grunnane for eventuelt å flytte til Sogn og Fjordane, og svarar «god balanse mellom jobb og fritid» og «at den perfekte jobben/stillinga dukkar opp». På den sosiale sida dreg dei fram «nærleik til vener og familie», «naturen» og «høve til å dyrke sport og friluftsliv» som viktige faktorar.