Sogn og Fjordane er det fylket i landet som har færrast Miljøfyrtårnsbedrifter, men nokre har teke tak.

Blant dei er Sogn og Fjordane Energi som blei sertifisert i fjor. Også Fretheim Hotel i Flåm har denne statusen. Sist ut er Sparebanken Sogn og Fjordane sitt hovudkontor i Førde, som fekk si sertifisering i juni 2009.

Adm.dir i Sparebanken Sogn og Fjordane, Arvid Andenæs, meiner fleire burde gjere det same.

"Vinn-vinn" for alle

-Sertifiseringa "Miljøfyrtårn" er eit bevis på at vi har gått gjennom rutinane og vanane våre og gjort tiltak for å gjere desse så gode som mogleg. Det å ha ei drift som er mindre belastande for miljøet er ”vinn-vinn” for alle. Vi oppmoder andre til å gå den same løypa som oss. Det er både lærerikt, kostnadssparande og viser at ein tek klimautfordringane på alvor, seier Andenæs.

Nils Gjerland stod for overrekkinga og skrytte av miljøengasjementet til banken. Han var glad for å kunne dele ut første sertifikatet frå Miljøfyrtårn i Førde. 

Samfunnsansvar i praksis

"Miljøfyrtårn" er ei nasjonal ordning som gjev ei praktisk tilnærming til miljøarbeid. Ordninga tek føre seg tema som transport, innkjøp, avfall, HMS, energibruk og utslepp. Og det er ikkje berre bedrifter som kan gjere dette krafttaket for miljøet. Også Norsk Countryfestival på Breim og Brandsøy skule i Flora er  blant dei som er blitt "Fyrtårn".

Mange effektar

Ei miljøsertifisering er positiv med tanke på profilering, men den kan også gje betre lønsemd, lågare sjukefråvær og meir miljømedvitne tilsette.

Vestnorsk Enøk  som er rådgjevingsmiljøet til SFE Kraft AS, har i dag fylket sin einaste offentleg godkjende Miljøfyrtårn-konsulent. Dei opplever at interessa for miljøsertifisering er stor.