Kristin Sandal frå Byrkjelo tok denne månaden til i jobben som prosjektleiar for Huset i bygda. Målet med prosjektet er å styrke dei lokale kulturbygga i fylket som sosial møtestad, som arena for utøving av kultur og som kulturminne.

- Livsnerven i bygda
Kristin Sandal gler seg til å setje i gang arbeidet med Huset i bygda.

- Huset i bygda er for mange sjølve livsnerven for det sosiale livet og ein møteplass for innbyggarane. Det er mange fritidsaktivitetar for både born og vaksne som føregår i husa, og i mange bygder er ungdomshuset eller bygdehuset det einaste huset til slike føremål. Utan det lokale kulturhuset kan det nokre stader bli slutt på aktiviteten i bygda, seier Sandal.

- Når eg ser betydinga av desse husa er det ein stor inspirasjon til å bidra til å oppretthalde og vidareutvikle dei. Det er noko eg håper å kunne gjere gjennom prosjektet.

Brei organisasjonserfaring
Kristin Sandal vaks opp i Breim, og er i dag sjølvstendig næringsdrivande. Ho har dei siste to åra vore Fylkesaksjonsleiar i TV-aksjonen, og er styreleiar i Norsk Country Treff. Sandal har brei organisasjonserfaring frå mellom anna 4H, Bygdeungdomslag, Stiftinga Norsk Country Treff og frå kommunepolitikk. Ho har eit nært forhold til dei lokale kulturhusa i Breim.

- Kulturhusa i Breim har hatt myke å seie for meg i alle år, gjennom 4H, bygdeungdomslag, basarar, bygdefestar, bryllaup og andre aktivitetar.

- Kva håpar du å oppnå gjennom prosjektet?

- Eg håpar at det blir større fokus på ungdomshus, grendehus og andre organisasjonseigde kulturbygg. Eg vil at både innbyggarar, politikarar og andre i større grad ser nytta og verdien i husa. Vi må jobbe for å skape meir aktivitet i dei og legge til rette slik at huseigarane kan forvalte husa på ein god måte, fortel prosjektleiaren.  

Attraktive bygdesamfunn
Alle kulturbygg som blir eigd og drive av ein frivillig organisasjon kan få hjelp gjennom Huset i bygda. Sogn og Fjordane Ungdomslag og Norske kulturbygg har tatt initiativet til prosjektet som tok til våren 2009. No vil dei to organisasjonane satse enno sterkare. Lokale huskurs, bygdemøte, regionale kurs, dokumentasjon og utvikling av idébank og nye verktøy er sentralt i prosjektet. Noko av det første på tapetet er Kulturhuskonferansen i Olden 13. mars.

- Eg håpar at huseigarane i fylket vert med på å forme dette prosjektet og kjem med innspel til kva som kan gjerast, kva dei treng hjelp til og at dei vil bidra med erfaringane sine, seier Kristin Sandal.

- I Sogn og Fjordane bur mange i mindre grendelag eller bygder. For å halde på ein desentralisert busetnad og skape attraktive bygdesamfunn og nyetablering, er det viktig med eit rikt kulturliv og gode fritidstilbod. Huset i bygda er vesentleg for å få til dette. Eg trur at mykje av identiteten til ei bygd og innbyggarane forsvinn om dei tradisjonsrike kulturhusa forsvinn. Det er difor viktig for både lokalsamfunn, innbyggarane og kulturlivet å ta vare på og utvikle husa, avsluttar den ferske prosjektleiaren.  

For ytterlegare informasjon kontakt:     

Kristin Sandal, prosjektleiar i Huset i bygda: Tlf 952 85 015
Åge Avedal, nestleiar i Sogn og Fjordane Ungdomslag: Tlf 970 72 734