Åmot Gard i Bygstad, sopranen Jorunn Torsheim og kokken Christel Eide frå Mitt lille kjøkken, har vore i New York for å presentere eit nytt reiselivsprodukt.
 

På jakt etter kresne turistar

- Vi er på jakt etter kundane som har opplevd alt, men som framleis søkjer det unike og ekte, som vil ha eksklusive opplevingar, seier Steinar Sørli frå Åmot operagard i ei pressemelding.

Lukka arrangement

Operacruise vart lansert under eit lukka arrangement i New York, der rundt 30 agentar deltok. Blant dei som deltok var reiselivsagenten til skodespelaren Michael Douglas.

Under arrangementet framførte Jorunn Torsheim songar av Edvard Grieg og Puccini, og Christel Eide serverte vikinginspirerte coctails og norsk fingermat.

Opplegget til operacruise

Dei som blir med på operacruise landar på Flesland og startar den åtte dagar lange opplevinga under Festspela i Bergen, med musikk av Edvard Grieg og Ole Bull på Troldhaugen og Lysøen.
Deretter går turen vidare med fly til Førde, der deltakarane vert henta til Åmot Gard. Her får dei høyre operasongaren Solveig Kringlebotn, før sjølve cruiset startar.

Ein privat yacht hentar gjestene i Dalsfjorden og tek dei med sørover til Sognefjorden og inn til Finnabotn. Med på cruiset er Jorunn Torsheim, som vil by på eigne konsertopplevingar undervegs.
 

Tek Norge i bruk

Dei neste dagane står både Nærøyfjorden og Flåmsbana på programmet, før turen blir avslutta i Oslo med to oppsetjingar på Den norske opera og ballett. Der møter dei igjen Solveig Kringlebotn i ei av hovudrollene.
Næringslivet i Sogn og Fjordane kan lære mykje av dette samarbeidet; korleis utvikle produktet sitt, og ikkje vere redd for å sikte høgt.